تفاصيل اجراء عمرة بدون محرم بالسعوديه

 

عمرة بفيزا ترانزيت السعوديه من غير شينجن أو فيزا أمريكا أو بريطانيا…

إستكمالا للكلام عن العمره وبناء على طلب الجماهير 

و حقيقي نفسي من كل قلبي إلي مشتاق للعمره ربنا يكتبهاله  قريبا.

هتحجز أي رحله لأي بلد فيزتها سهله أو من غير فيزا 

دبي/ لبنان / ماليزيا / المالديف ..

-أنا حجزت دبي فيزيتها سهله ومضمونه وبتطلع علطول  بتطلع بشهر وتكلفتها ١٥٠٠ جنيه.

-هتدخل على الموقع الرئيسي لطيران السعوديه 

وتحجز رحلة دبي  هيجيلك انك هتنزل مرتين ترانزيت في السعوديه ، مره في الذهاب ومره في العوده

إختار إنت عايز تدخل السعوديه في رحلة الذهاب ولا رحلة العوده .

وهتلاقي مكتوب stopoverin Riyadh or Jeddah

هتدخل على discover 

وهتختار  jeddah

وعدد الأيام إلي هتعدهم ٤ 

بعدها بيجيبلك كذا طياره ومدة الترانزيت بينهم .

أهم حاجه ان  مدة الترانزيت متزيدش عن ٩٦ ساعه  أو إختار عدد ساعات أقل 

مهم جدا 

بعدها بتأكد حجز التذكره وبتدفع 

ومفروض الفيزا بتجيلك عالإيميل علطول .

تمن فيزا الترانزيت ٢٠٠٠ جنيه

هتنزل دبي يوم مثلا أو على حسب ما انت عايز .

اعرف ناس نزلوا دبي واخدوا ختم خروج ودخلوا خدوا الطياره إلي بعدها للسعوديه

وصلنا السعوديه بحمد الله  مطار جده 

هما شوية في الجوازات  مش متعوديين عالفيزا ديه ، فهيسألوك كام سؤال 

وممكن يطلبوا منك البوردينج إلي طلعت بيه من دبي وهيشوفوا التذكره وهيتأكدوا من وقت مغادة طيارة العوده من السعوديه ..

وهتاخد ختم الدخول وهتلاقي ترحاب منهم كمان وتمني بالعوده مره أخرى 

أول ما هتطلع من المطار هتلاقي في وشك أكواريم سمك

وراه علطول هتلاقي ال ٣ شبكات المحمول وبينهم مدخل القطارات 

هتشتري خط سعودي ب ٨٠ ريال ١٠ جيجا 

وهتنزل برنامج اعتمرنا وابليكيشن القطر 

هتدخل رقم التأشيره في اعتمرنا وبياناتك وتعمل حساب مش هياخد ٥ دقايق وتقدر تحجز عمرتك في اليوم والميعاد المناسب ليك 

(نسيت أقولكم إن وإنتم في الطياره وقبل الميقات بنص ساعه  طاقم الطياره هيبلغوكم عشان لو عايزين تستعدوا للإحرام 

هتلاقي الرجاله قامت تلبس  لبس الإحرام وإلي عايز يقوم يتوضى 

وفوق الميقات بالظبط بيبلغوك اننا معديين فوقه وتقدروا تحرموا دلوقتي 

تصلوا ركعتين وتنوا الإحرام وتاخدوا بالكم قوي  منشدش جلده ولا نوقع رمش ولا شعره قاصدين  عشان متفقدوش إحرامكم )

بعد ما فعلنا الأبليكيشن أدامكم إختياريين تروحوا بيهم مكه

يا إما بالقطر وبتحجزوا من  أبليكيشن قطار الحرمين أو تاخدوا تاكسي لمكه علطول 

والميزه انه هينزلكم ادام الاوتيل 

القطر بيبقى في حدود حاجه وتلاتين أو وأربعين على حسب ميعاده 

والتاكسي بالإتفاق يعني كنا ااتنيين اخد مننا ١٢٠ وركب حد معانا شير 

وكان مريح وسريع وصلنا في ساعه.

شوفوا الوسيله الأسرع وانطلقوا بيها عشان متضيعوش وقت

.عامل الوقت مهم عشان متلاقيش نفسك مضيع الساعات في الإنتظار..

هما أقل من ٩٦ ساعه

وعشان تقدروا تستفيدوا أقصى إستفاده من وقتكم القصير هناك حاولوا متاخدوش أوتيل بعيد  

ممكن ناخد أوتيل نجوم أقل بس يكون قريب 

أنا نزلت في أوتيل إسمه مآثر الإيمان وكان جنبه الثريا 

كانوا ب ١٧٠ ريال الأوضه الدبل 

وبالظبط ٣ دقايق من الحرم  مشي

فيه أوتيلات أقرب وأغلى  طبعا كل واحد على حسب ما يحب 

الحجوزات كلها من Booking أو   Agooda

تقدر تنظم وقتك يومين مكه مثلا ويومين المدينه .

ممكن تروح المدينه من بداية رحلتك تركب القطر من المطار للمدينه ب ١٠٠ ريال تقريبا  وتحرم للعمره من آبيار علي  في الطريق من المدينه لمكه 

لو عايز تروح المدينه من مكه فيه اختيارين القطر وده سريع في ساعتين وأغلى رحلاته متوسط من ١٧٠ ل ٢٧٠ ريال للمشوار الواحد 

وفيه عربيات عند جبل عمر بتسأل هناك فين عربيات المدينه 

وهيدلوك عليها او تاخد تاكسي ب ١٠ ريال هينزلك عند موقف المدينه ادام شويه 

فيه عربيات هونداي ٧ راكب مكيفه وجميله ب ٧٠ ريال الفرد او عربيه تاكسي مخصوص هياخد ١٠٠ للفرد 

الطريق بساخد بالظبط ٤ ساعات ونص .

تجربتي أنا محجزتش أوتيل  إتحركت بعد صلاة الضهر من الحرم وركبت  عربيه هونداي وصلت قبل صلاة المغرب ووقفنا صلينا العصر في الطريق

صليت مغرب وعشا وزورت الرسول .

وزيارة الروضه الشريفه وقبر الرسول للسيدات بتبقى بعد صلاه العشا وبعد صلاة الفجر 

من بوابة ٢٥-٢٩-٣٠

وخدوا بالكم حاولوا متطلعوش بعد صلاة العشا عشان بيقفلوا الأبواب عشان الزحام .

خلصنا زياره قبل منتصف الليل وخرجت قعدت طول الليل في الحرم النبوي مستمتعه بالسكينه إلي مش موجوده في أي مكان عالأرض غير هناك لحد الفجر .

وصليت الفجر وسألت على عربيات  مكه برضو موجوده ادام بوابة ٢٥  ..

اتمشينا شويه من ادام البوابه علطول وحوزنا يمين نزلنا نفق مشاه وطلعنا لقينا موقف مكه 

وأخدنا تاكسي مخصوص فردين ب ٢٠٠ ريال ورجعنا مكه في ٤ ساعات .

وممكن وانت راجع يعدي بيك على آبيار علي تحرم لعمره تانيه لو فيك صحه 😁

الحمد الله ربنا وفقنا ووصلنا قبل صلاة الجمعه حضرناها في الحرم المكي  وقضينا اليوم مستمتعين بنفحات يوم الجمعه وساعة الإجابه لحد المغرب …

القطار طبعا أسرع بياخد ساعتين من مكه للمدينه بس مواعيده مظبطتش معايا ده غير  إني ملقيتش فيه حجوزات في الويك إند .

وأخيرا إستزيدوا من العبادات هناك 

فهناك الحسنه ب ١٠٠ ألف في الحرم المكي 

وب ١٠٠٠ في الحرم النبوي

طبعا آخر دخول لمكه بالفيزا ديه يوم ٩ يونيو  عشان موسم الحج 

هتقفل شهر وهترجع تفتح تاني بعد ٩ يوليو

كل ما حجزتم بدري كل ما التذاكر كانت أرخص طبعا ووفرتم 

متوسط  تكلفة الرحله ١٥ ألف جنيه  بيقل أو بيزيد

على حسب سعر التذكره 

فيزا الترانزيت ٢٠٠٠ جنيه

فيزا  دبي ١٥٠٠جنيه

 الطيران من ٧٠٠٠-١٠٠٠٠ جنيه

سعر الليله للأوضه الدبل من ١٢٠- ٣٥٠ ريال في الليله

تقيل الله منا ومنكم